الجزء الثاني من الدرس الثالث: وظيفة و طريقة إنشاء و تركيب ملف الـ Robots و خريطة الموقع

يبقى كده انت عملت ايه؟؟ ... كده انت منعت جميع روبوتات البحث من الدخول لموقعك و أرشفته زي ما شفنا في أول سطرين ... ماعدا جوجل اللي هيدخل جميع الصفحات و يأرشفها ماعدا المجلدين اللي انت حددتهم cgi-bin و privatedir ... طيب لو مسحنا أمرين الـ Disallow بتوع Googlebot و كتبنا Allow – نقطتين – Slash يبقى كده انت بتسمح لروبوت بحث جوجل بس بدخول موقعك و بتمنع أي روبوت بحث غيره ... طيب لو عاوزين نمنع محركات البحث من أرشفة أنواع معينة من الملفات زي ملفات الفلاش مثلاً هنكتب الأمر ده Disallow – نقطتين – Slash – نجمة – نقطة – swf – علامة الـ Dollar Sign ... طيب لو كتبنا الأمر بالشكل ده ... Disallow – نقطتين – Slash – dir – Slash و الأمر اللي بعده Allow – نقطتين – Slash – dir – Slash – نجمة – نقطة – html – علامة الـ Dollar Sign يبقى كدة احنا هنمنع جميع محركات البحث من الدخول لمجلد dir و أرشفة أي ملف جواه ماعدا الملفات ذات الامتداد html ... هاه ... الموضوع بأه أسهل شوية ؟ ... آخر مثال و اللي بيتكتب مرة واحدة بس في ملف الـ Robots هوه الـ Sitemap و بيكون بالطريقة دي Sitemap – نقطتين و بعدين هنكتب الرابط اللي بيؤدي لخريطة موقعك أو الـ Sitemap الخاصة بموقعك و اللي هنتكلم عنها دلوقتي كلام كتير.

و بكده نقدر نمنع و نسمح لمحركات البحث كلها أو بعضها بالدخول لمواقعنا أو أجزاء منها في صورة مجلدات معينة أو صفحات محددة بعينها زي ما شفنا في الأمثلة اللي فاتت بالإضافة لتحديد مكان الـ Sitemap الخاصة بالموقع ... و طبعاً بعد ما نكوّن ملف الـ Robots لازم يكون اسمه بالظبط Robots.txt بنرفعه على المجلد الرئيسي للموقع و مش جوه أي مجلد فرعي تاني ... و يكون الرابط بتاعه كده http://www.yoursite.com/robots.txt مع تغيير yoursite.com طبعاً لدومين موقعك ... عشان هوه ده المكان المتفق عليه مع محركات البحث و اللي بتفتحه و تقرا تعليمات ملف الـ Robots منه الأول قبل ما تبدأ في أرشفة الموقع.

و بكده نكون خلصنا موضوع أوسمة الميتا و عرفنا الحد الأدنى من اللي لازم نعرفه عشان يبقى موقعنا قوي و متماسك و مقبول بالنسبة لمحركات البحث ... تعالو بينا بأه نتكلم عن موضوع جديد أهميته ماتقلش عن أهمية أوسمة الميتا و هوه الـ Sitemap أو خريطة الموقع ... الـ Sitemap دي ببساطة عبارة عن ملف بيضم روابط جميع صفحات موقعك ... و الملف ده له أنواع على حسب محرك البحث و هنركز على أهم نوعين... النوع الأول بسيط ... عبارة عن ملف تكست عادي اسمه urllist.txt و ده مفضل من Yahoo ... و النوع التاني اللي بيفضله Google هوه ملف من نوع xml و أسماء الملفات هنا مش مشكلة و هنعرف ليه في آخر كلامنا عن الـ Sitemap ... طيب ايه أهمية ملفات الـ Sitemap دي اللي بتضم روابط جميع صفحات موقعك ... الإجابة ... توفير وقت كبير على محرك البحث لأرشفة موقعك ... يعني بدل ما محرك البحث يدخل صفحة .. صفحة و يأرشفها و يدور على الروابط الداخلية اللي فيها عشان يكمل أرشفة الموقع زي ما شرحنا ... لأ انت بتقدملة جميع الروابط اللي هوه هيحتاجها عشان يأرشف موقعك ... في ملف واحد و ده بيوفر عليك وقت مش بسيط ممكن يوصل لشهور عشان موقعك يتأرشف بجميع صفحاته على محركات البحث ... بالإضافة لإنك بتقدمله روابط لصفحات يأرشفها ممكن مايكونش ليها روابط في صفحات تانية و مكانش هيقدر يوصلها لولا ملف الـ Sitemap اللي انت جهزتهوله.

طيب احنا عشان نكون ملف Sitemap هل هندخل على صفحات الموقع كلها و نجمع روابطها في ملف عشان نقدمها لمحرك البحث؟ ... طب افرض الموقع صفحاته أكتر من ألف أو ألفين صفحة أو أكتر ... الموضوع هيكون صعب جداً ... لا لا ... كل حاجة و ليها حل ... احنا هنستخدم في الموضوع ده برنامج بسيط جداً و مجاني اسمه GSiteCrawler ... اعمل بحث عنه في جوجل هتلاقيه مجاني على موقعه الرسمي و نزله و ثبته على جهازك ... و يللا بينا نفتح البرنامج و نشوف هنصمم Sitemap مع بعض ازاي.

نفتح برنامج GSiteCrawler ... نضغط على Add new project ... نضغط Next ... نكتب عنوان الموقع الرئيسي هنا و ليكن مثلاً ... http://www.your-elegance.com/ و نسمي الـ Project بتاعنا أي اسم و نضغط Next ... البرنامج دلوقتي بيختبر الاتصال بالموقع ... الصفحة دي فيها بعض الاختيارات هنعدي عليهم بسرعة كده ... أول واحد بيقولك هل الروابط و أسماء الملفات Case Sensitive يعني حساسة لحالة الأحرف الانجليزية الكبيرة و الصغيرة؟ ... لأن سيرفر اللينكس مثلاً لو رفعت عليه ملفين ليهم نفس الاسم لكن حالة الأحرف في كل واحد غير التاني بيعتبرهم ملفين مختلفين تماماً ... التاني بيقولك انه هيفلتر المتغيرات اللي بتكون في آخر الروابط زي الـ id أو الـ phpsessid و اللي بتكون في المواقع المتبرمجة بلغة برمجة web زي الـ php و .NET ... المثال المعروف للنوع ده من المواقع هو منتديات الفي بي و أخواتها ... طبعاً في حالة المواقع دي بنشيل العلامة من الاختيار ده ... و تحت هنا كاتبلك أنواع الملفات اللي هيضم روابط ليها من موقعك لخريطة الموقع ... زي ملفات الصور و الفيديو و المستندات الـ pdf و الـ doc و غيرهم ... طبعاً ده اختياري حسب رغبتك انت ... نضغط Next ... هنا بيخيرك لو انت عاوز ترفع الملفات بالـ ftp على سيرفرك بعد تكوينهم من نفس البرنامج ... انا شخصياً بفضل رفع الملف في خطوة تانية منفصلة بعد ما الملفات تتنشئ ... نضغط Next ... هنا اختيارات تانية ... الأول بيسألك يقرا ملف الـ Robots الموجود في الموقع قبل ما يعمل الـ Sitemap و للا لأ ... التاني بيسألك يفحص ملفات خطأ الـ 404 ... الصفحة المطلوبة غير موجودة الخاصة بالموقع ... التالت هل يدور على الصفحات المتأرشفة فعلاً في جوجل ... و آخر اختيار بيقولك انه هيبدأ في تكوين ملفات الـ Sitemap في الخطوة اللي جاية ... طبعاً احنا هنا هنسيب كل الاختيارات زي ما هيا و هنشيل العلامة الموجودة على تالت اختيار عشان نكون Sitemap نضيفة من غير ما نستخدم الصفحات الموجودة في جوجل ... لأن ممكن جوجل يكون مخزن عنده صفحات انت مسحتها أو عدلت روابطها ... و نضغط Finish.

هيبدأ البرنامج في فحص موقعك و تجميع الروابط عشان يكون بعد كده الـ Sitemap ... نسيبه لما يخلص خالص و يجيبلك الرسالة دي ... بعد كده هنضغط على Generate و في المربع ده نضغط Generate files ... نفتح الفولدر اللي ملفات الـ Sitemap اتخزنت فيه هنلاقيه بالشكل ده ... البرنامج بيعمل أكتر من نوع لملفات الـ Sitemap عشان يقدمها لأكبرعدد ممكن من محركات البحث ... نفتح برنامج الـ ftp اللي بنرفع بيه ملفاتنا على سيرفر الموقع و نعمل مجلد جديد باسم Sitemaps و نرفع جواه الملفات دي كلها ... و بكده نكون عملنا ملفات الـ Sitemap لموقعنا لكن فاضلنا خطوة أخيرة و هيا اننا نوجه روبوتات البحث للملفات دي و احنا قلنا قبل كده اننا بنكتب أمر في ملف الـ Robots عشان نوضح مسار أو رابط الملفات دي لكن ده مش كفاية.

هنتكلم في الفيديو اللي جاي ان شاء الله عن الطريقة المثالية اللي هنخلي بيها محركات البحث تدخل و تقرا الـ Sitemap بتاعتنا ... و هنتعرف على أدوات جديدة بتقدمها محركات البحث نفسها لأصحاب المواقع و ازاي نستخدمها ... و هنتكلم كمان عن موضوع جديد كنت اتكلمت عنه في عجالة و انا بشرح ازاي عناكب البحث بتأرشف المواقع ... و هوه الروابط الخارجية و دورها و أهميتها الكبيرة في أرشفة المواقع و اللي بنسميها الـ Backlinks ده موضوع مهم للغاية يا جماعة أكتر مما تتخيلوا.

و بكده الدرس ده انتهى و اشوفكم على خير في الدرس اللي جاي ان شاء الله ... و السلام عليكم و رحمة الله و بركاته.

الجزء الأول من الدرس الثالث: وظيفة و طريقة إنشاء و تركيب ملف الـ Robots و خريطة الموقع

بسم الله الرحمن الرحيم

أهلاً بيكو في الفيديو التالت من دورة السيو المتقدمة ... قبل ما نكمل كلامنا عن أوسمة الميتا في الدورة بتاعتنا ... عاوز بس أطلب طلب صغير من أي حد بيشاهد الفيديو ده ... الفيديو ده هوه الفيديو التالت في سلسلة الفيديوهات التعليمية اللي بتتكلم عن الـ SEO ... لو كنت استفدت من المعلومات اللي اتشرحت لغاية دلوقتي في الدورة عاوز منك حاجة مهمة جداً بالنسبالي ... عاوزك تنشر الفيديو ده و الفيديوهات التانية في الدورة لأصحابك و أصدقاءك ... يعني لو انت بتشوف الفيديو ده على اليوتيوب أو الفيس بوك أو غيره ... أتمنى انك تستخدم خاصية النشر الموجودة على الموقع اللي انت بتشاهد الفيديو ده من خلاله و تبعته لأكبر عدد ممكن من أصحابك ... و بكده أكون شاكر ليك جداً.

نكمل كلامنا ... اتكلمنا في الدرس اللي فات عن أوسمة الـ Title و الـ Description و الـ Keywords و عرفنا ازاي بنكونهم بطريقة مظبوطة متوافقة مع محركات البحث ... و عملنا تحليل ليهم قبل التركيب و بعد التركيب عشان نعرف احنا ماشيين صح و للا غلط ... في الدرس ده ان شاء الله هنتكلم على آخر أهم أوسمة الميتا و هوه الـ Robots و هنعرف هوه بيتكون من ايه و ازاي نكتبه و نركبه و أهميته بالنسبة للموقع و محركات البحث ... و هنتكلم عن موضوع جديد مختلف عن أوسمة الميتا لكن له علاقة قوية بيها و أهمية كبيرة عند محركات البحث و بيوفر عليك وقت و مجهود كبير جداً و هنعرف ازاي.

كلمة Robots بتشير إلى روبوتات البحث أو عناكب البحث ... و عشان نفهم معنى كلمة عناكب البحث كويس لازم نعرف ازاي محرك البحث بيأرشف أي موقع بيزوره ... أولاً لازم يكون فيه سبب يعرّف محرك البحث ان موقعك موجود أساساً على شبكة الانترنت ... لأن الموقع على شبكة الانترنت عامل زي نقطة أو منطقة صغيرة و محدودة جداً في صحرة واسعة جداً لو محدش دلك على مكان المنطقة دي بالظبط مش هتعرف توصلها ... و الموضوع ده مهمة جداً جداً و هيكون موضوع درسنا الجاي ان شاء الله ... خلونا منبعدش عن موضوعنا ... قلنا محرك البحث هيوصل لصفحة من صفحات موقعك بطريقة ما ... و هيبدأ يدور في الـ Meta Tags الموجودة فيها و يخزنها مع رابط الصفحة دي على الداتا بيز بتاعته ... و بعد ما يخلص ... هيدور في نفس الصفحة على الروابط الموجودة فيها ... و الروابط في أي صفحة نوعين ... روابط داخلية لصفحات تانية في نفس الموقع ... و روابط خارجية لمواقع تانية ... طبعاً محرك البحث بيهتم بالنوعين جداً ... لكن عشان يكمل أرشفة موقعك بيكمل في اتجاه الروابط الداخلية ... و بيدخل على كل رابط منها و كل رابط هيوصّله لصفحة تانية من صفحات الموقع و كل صفحة ليها بيانات و أوسمة ميتا مختلفة ... بيخزن بيانات كل صفحة وصلها مع الرابط بتاعها على الداتا بيز و بيكمل على الروابط اللي في كل صفحة من الصفحات اليي تم أرشفتها هكذا ... ها ... حاسس بإيه دلوقتي ... حاسس انك قدام عنكبوت بيغزل بيته و بيربط كل خيط في التاني و بيكون شبكة مترابطة ... من هنا سميناها عناكب البحث لأنه مش عنكبوت واحد... و إلا مكانش هيلاحق على الكم الهائل من المواقع الموجودة على شبكة الانترنت ... من الكلام اللي احنا قلناه دلوقتي هنسأل نفسنا ... طب افرض فيه صفحة من صفحات الموقع ملهاش أي رابط في الصفحات التانية ... طبعاً روبوت البحث مش هيعرف انها موجودة أصلاً و مش هياخد باله منها و هتبقى كأنها صفحة ميته معزولة ... عشان كده الموقع القوي لازم يكون متماسك و كل صفحة فيه بتؤدي للتانية من خلال الروابط.

كده فهمنا يعني ايه روبوتات أو عناكب البحث ... نرجع نكمل كلامنا عن وسم الـ Robots ... زي ما قلنا في تعريفه في الدرس الأول هوه وسم بيدي لعناكب البحث بعض التعليمات عشان موقعك يتأرشف بالطريقة اللي انت عاوزها ... طيب الطريقة دي يعني ايه ... يعني لو انت مثلاً مش عاوز صفحة معينة أو مجموعة من الصفحات تتأرشف ... أو فيه محرك بحث معين مش عاوزه يأرشف موقعك خالص ... أو ممكن كمان تعرف محركات البحث مكان خريطة الموقع بتاعك اللي هنتكلم عنها النهاردة ان شاء الله.

الـ Content الخاص بوسم الـ Robots له قيم محدده و مش كتير و كل قيمة ليها وظيفة معينة و ليها قيمة عكسية بتمنع الوظيفة دي حاجة كدة زي الأمر و الأمر المضاد و من أهم القيم دي الـ INDEX و الـ FOLLOW و الـ ARCHIVE... و من مميزات وسم الـ Robots ان كل القيم دي بتتكتب مع بعض في نفس السطر داخل قوسين الـ Content و بنفصل بين كل قيمة و التانية بـ Coma أو فاصلة ... نمسك كل قيمة و نعرف معناها ... أول واحدة INDEX و معناها أمر لروبوت البحث بأرشفة الصفحة و تخزين بياناتها و عرضها في نتايج البحث ... و ده هوه السلوك الافتراضي الطبيعي اللي بتقوم بيه روبوتات البحث حتى لو القيمة دي مش موجودة في وسم الـ Robots و القيمة المضادة ليها NOINDEX و ده أمر مباشر لروبوت البحث انه ميدخلش يأرشف الصفحة اللي مكتوب فيها القيمة دي ... تاني قيمة FOLLOW و معناها أمر لروبوت البحث بتتبع الروابط الموجودة في الصفحة ... و برده هوه ده السلوك الافتراضي لروبوتات البحث و القيمة اللي بتمنع الروبوتات من تتبع الروابط هيه NOFOLLOW ... تالت قيمة ARCHIVE و معناها أمر لروبوت البحث بأرشفة الصفحة بس من غير ما تظهر في نتايج البحث ... و القيمة المضادة ليها NOARCHIVE ... و آخر قيمة هيه ALL و دي بتوجه عناكب البحث لتنفيذ جميع القيم الافتراضية التانية اللي قلناها ... يبقى خلينا نتفق على حاجة ... روبوتات البحث دايماً بتوجه سلوكها لمصلحة الموقع و أرشفته بالطريقة الكاملة و السليمة إلا إذا أخدت تعليمات بغير كده ... و طبعاً التعليمات دي بتاخدها من الـ Content بتاع وسم الـ Robots ... أو من خلال ملف الـ Robots.txt.

طيب ... ايه بأه ملف الـ Robots.txt و بيتكون من ايه و ايه وظيفته و ازاي نركبه على الموقع؟ ... ببساطة شديدة الملف ده عبارة عن ملف تكست عادي جداً لكن لازم اسمه يكون Robots بيكون فيه عدد بسيط جداً من السطور اللي بتلخص مجموعة من التعليمات الموجهة لروبوتات البحث ... هوه بيغني عن وسم الـ Robots لكن لازم الوسم يكون موجود في الصفحات لأنه من العوامل اللي بتساعد على رفع نظرة محرك البحث لموقعك ... و بيدل على انك مهتم بأرشفة الموقع و بتخاطب محركات البحث من خلاله ... و الملف ده مكانه على الموقع في المجلد الرئيسي يعني مش جوه أي محلد فرعي تاني ... الأوامر في ملف الـ Robots.txt نوعين اتنين بس Allow و Disallow و الأمر بيتكتب بطريقة معينة تعالو بينا نشوف ازاي.

هندي شوية أمثلة لأوامر ملف الـ Robots كل واحد هيفهم من خلالها ان شاء الله أنسب الأوامر اللي هيكتبها في الموقع بتاعه ... نفتح ملف تكست فاضي ... و نكتب User-agent – نقطتين – مسافة – نجمة و نضغط Enter و نكتب Disallow – نقطتين – مسافة – Slash ... الـ User-agent بيعبر عن روبوت البحث اللي انت عاوز تديله أمر ... و رمز النجمة ده معناه انك بتدي الأمر لجميع روبوتات البحث اللي هتدخل موقعك ... و Disallow ده أمر منع دخول الموقع و أرشفته ... يعني بالسطرين المكتوبين دول انت اديت أمر لجميع روبوتات البحث بعدم الدخول لموقعك و أرشفته ... طبعاً احنا مش هنرفع ملف الـ Robots على الحالة دي ... ده بس مثال ... طيب لو كتبنا Googlebot-Image بدل رمز النجمة ... كده يبقى انت بتمنع روبوت جوجل الخاص بالصور من دخول موقعك و أرشفة الصور الموجودة فيه ... يعني أي صورة على موقعك مش هتظهر أبداً في نتايج بحث جوجل و ده مفيد في الحفاظ على الـ Bandwidth بتاع موقعك ده لو موقعك مش موقع صور أصلاً ... طيب لو رجعنا النجمة و كتبنا 3 أوامر Disallow ... في الأول هنضيف /cgi-bin/ و في التاني هنضيف /privatedir/ و في التالت هنضيف /tutorials/blank.htm ... كده انت منعت جميع روبوتات البحث من الدخول على مجلد cgi-bin و privatedir و صفحة tutorials/blank.htm و أرشفتهم ... طيب لو رجعنا للمثال الأول اللي بنمنع فيه جميع عناكب البحث و زودنا تحته User-agent – نقطتين – مسافة – Googlebot نضغط Enter و نكتب أمرين Disallow الأول هنضيفله /cgi-bin/ و التاني هنضيفله /privatedir/ يبقى كده انت عملت ايه؟؟ ... كده انت منعت جميع روبوتات البحث من الدخول لموقعك و أرشفته زي ما شفنا في أول سطرين ... ماعدا جوجل اللي هيدخل جميع الصفحات و يأرشفها ماعدا المجلدين اللي انت حددتهم cgi-bin و privatedir ...

الجزء الثاني من الدرس الثاني: تكوين و تحليل وسم الكلمات المفتاحية و وصف الصفحة

نشوف بقى نتيجة تحليل الصفحة اللي كتبنا عنوانها دلوقتي ... أول مربع عندك فيه بيانات سريعة عن السيرفر اللي عليه الصفحة دي ... و آدي وسم الـ http-equiv الـ Content Type و الـ Charset زي ماحنا شايفين في أول البيانات المعروضة ... بعد كده هنلاقي أوسمة الميتا المهمة اللي كلامنها عليها دلوقتي الـ Title و الـ Description و الـ Keywords و الـ Robots و كمان الـ Author ... و تحليل الأوسمة دي تحت هنا ... الـ Title 40 حرف متوافق بنسبة 100% ... الـ Description مكتوب قصاده Found no description meta tag مفيش وسم Description أصلاً ... الـ Keywords مش كاتب عنها حاجة لأن الوسم مش موجود في الصفحة برده ... الـ Robots 12 حرف و الـ Author 21 حرف

بعد كده هنلاقي بيانات تانية زي حجم الصفحة 23,313 كيلوبايت و سرعة تحميلها أقل من ثانية واحدة ... و هنا كاتبلنا طريقة ظهور الصفحة كنتيجة من نتايج صفحة البحث زي ما شفنا في أول الفيديو ... بعد كده هنلاقي في المربع ده ... الكلمات الموجودة في روابط نصية في الصفحة ... و عدد مرات ظهورها ... المربع اللي بعده ... هنلاقي الكلمات الموجودة في وصف الصور و عدد مرات ظهورها ... كود أي صورة بيحتوي على رمز الـ alt ... و النص المكتوب في رمز الـ alt اللي يعتبر اسم الصورة أو وصف مختصر ليها ... مهم جداً لمحركات البحث و بيتحسب من ضمن محتوى الصفحة و ممكن تاخد منه كلمات مفتاحية ليها

بعد كده هنلاقي أهم مربع و اللي هيعتمد عليه شغلنا كله دلوقتي ... و هوه قايمة بجميع الكلمات الموجودة في الصفحة ... و جنب كل كلمة عدد مرات ظهورها و الـ Keyword Density الخاصة بيها محسوبة و جاهزة ... شوفتو الموضوع سهل ازاي ان شاء الله ... و القايمة دي متقسمة لتلات أعمدة ... العمود اللي عالشمال فيه الكلمات الفردية ... و اللي في النص الكلمات الثنائية يعني اللي بتتكون من كلمتين ... و العمود اللي عاليمين فيه الكلمات الثلاثية ... و كل نوع من التلات أنواع من الكلمات لازم يكون موجود في الكلمات المفتاحية الخاصة بالصفحة

بعد كده مربع الروابط أو اللينكات الموجودة في الصفحة ... و لازم ماتزودش عن 100 لينك في الصفحة عشان تكون اسمها Robot Friendly أو صفحة صديقة لروبوتات محركات البحث ... و آخر مربع فيه باقي أوسمة الميتا و بيانات تانية زيادة متهمناش دلوقتي

نرجع بقى لقايمة الكلمات و التلات أعمدة و نشوف هنطلَع منها الكلمات المفتاحية ازاي ... عشان نعرف اللي احنا هنعمله صح و للا غلط لازم نحدد احنا عاوزين نعمل ايه الأول ... دلوقتي عندنا شرطين لازم نحققهم في كل كلمة من الكلمات اللي هنختارها ... الأول ... الكلمة لازم تكون ليها علاقة بالموضوع اللي بتتكلم عنه الصفحة ... و التاني ... الكلمة لازم تكون مهمة بالنسبة لمحرك البحث زي ما شرحنا من شوية ... بمعنى ان الكلمة ممكن تكون متكررة كتير في الصفحة و ليها Keyword Density عالي يعني مهمة بالنسبة لمحركات البحث ... لكن ملهاش علاقة بالموضوع الرئيسي اللي الصفحة بتتكلم عنه ... زي مثلاً كلمة more info ... متكررة 5 مرات و الـ Keyword Density بتاعها 1.26% ... من أعلى النسب الموجودة بين كلمات الصفحة ... لكن ملهاش علاقة بموضوع الصفحة الرئيسي ... في الحالة دي هنستبعدها من الكمات المفتاحية طبعاً ... الخلاصة اننا هنفضل كل كلمة عن التانية من خلال العاملين دول بشرط ان الكلمة اللي ملهاش علاقة بموضوع الصفحة هنستبعدها من البداية.

و نطبق الكلام ده عملي على الصفحة اللي كتبنا عنوانها في الموقع ... الصفحة دي عبارة عن قايمة لمجموعة مقالات بتتكلم عن رفع الروح المعنوية و الثقة بالنفس ... لازم جداً نعرف الموضوع الرئيسي للصفحة عشان نقدر نحدد الكلمات المفتاحية اللي ليها علاقة بيه ... دلوقتي هنروح لموقع تحليل الميتا و ... نفتح ملف تكست فاضي ... و نبص على القايمة ... هنلاقي في أول القايمة الكلمات اللي ليها Keyword Density عالي زي article read edited ... كل دول ملهمش لازمة لأن ملهمش علاقة بموضوع الصفحة ... أول كلمة هتقابلنا ليها Keyword Density عالي و ليها علاقة بالموضوع هيا depression بمعنى اكتئاب ... هننسخها و نحطها في ملف التكست ... و نرجع نكمل ... تاني كلمة هنلاقيها anxiety بمعنى انزعاج هننسخها برده و نكمل ... هنلاقي mental بمعنى ذهني أو عقلي ... هنكمل بالطريقة دي لغاية ما نختار جميع الكلمات الموجودة في العمود الأول كامل ... و بعد كده ندخل على العمود التاني و التالت لغاية ما نجمع أفضل الكلمات اللي ينطبق عليهم الشرطين اللي قلناهم ... و نمسك ملف التكست اللي فيه الكلمات و نبدأ نصفيها ... ليه ... لأن انت مقيد بـ 20 كلمة مفتاحية بس ... يعني الموضوع مش مفتوح لأي عدد من الكلمات ... رغم ان عدد الكلمات المفتاحية ده متفاوت يعني ممكن محركات تقبل 20 و محركات تانية تقبل 25 أو 30 كلمة ... لكن "خير الكلام ما قل و دل" بالظبط الحكمة دي تنطبق على وسم الكلمات المفتاحية ... هنهتم في تصفية الكلمات هنا بتطبيق الشرط التاني "الكلمات اللي ليها علاقة أكبر بموضوع الصفحة" ... لأن الشرط الأول "أهمية الكلمات بالنسبة لمحرك البحث" منطبق عليها كلها ... يعني هنستبعد أقل الكلمات ليها علاقة بالموضوع ... و هتكون النتيجة في النهاية كده.

بكده نكون اخترنا Keywords ... و بنفس الطريقة هنختار الـdescription لكن مع الفرق ان الكلمات المفتاحية بتتكون من كلمات متفرقة و بين كل كلمة و التانية فاصة أو Coma مع الأخذ في الاعتبار ان الكلمات دي ممكن تكون ثنائية أو ثلاثية زي ما شفنا ... لكن الـdescription بيكون عبارة عن جملة مفيدة مش بس كلمات مرصوصة جنب بعضها ... يعني هنكون جملة مفيدة من الكلمات اللي بينطبق عليها الشرطين اللي على أساسهم اخترنا الـ Keywords و ده سهل جداً و لو طبقناه عندنا هنا ممكن يكون كده ... و بكده نكون جهزنا الـ Keywords و الـ description.

طيب ... نفتح برنامج تحرير الـ html اللي بنستخدمه زي الـ Expression Web أو الـ Dreamweaver أو حتى برنامج الـ Notepad و نبدأ نضيف Keywords و الـ description اللي جهزناهم في مكانهم الصفحة ... و نرفع الصفحة على السيرفر بأي برنامج FTP ... و نروح لموقع SeoCentro.Com نشوف نتيجة اللي احنا عملناه ... هنلاقي النتيجة جميلة جداً ... آدي الـ Title ... 40 حرف ... متوافق بنسبة 100% زي ما هوه ... الـ Description ... 151 حرف ... متوافق بنسبة 100% ... الـ Keywords 272 حرف و 20 كلمة ... متوافقة بنسبة 100% ... نتيجة تحليل رائعة ... و بكده تكون وفقت الصفحة مع محركات البحث و في انتظار أرشفتها من الروبوتات ...

طيب ... احنا كده خلصنا ؟ و عملنا كل حاجة ؟ لا طبعاً ... لسه خطوات تانية لازم نكملها ... الدرس ده كده انتهى و هتكلم في الدرس اللي جاي على آخر أهم الأوسمة الـ Robots بالإضافة لموضوع جديد متعلق بالوسم ده و هوه الـ Sitemaps اللي بتوفر كتير جداً من الوقت عليك و على محركات البحث لأشفة موقعك

الجزء الأول من الدرس الثاني: تكوين و تحليل وسم الكلمات المفتاحية و وصف الصفحة

بسم الله الرحمن الرحيم

أهلاً بيكو مرة تانية ...

في الفيديو اللي فات ... اتكلمنا عن أهمية أوسمة الميتا في رفع مستوى المواقع بالنسبة لمحركات البحث ... و اتكلمنا عن أهمية محركات البحث في نشر المواقع و زيادة عدد الزوار ليها ... و عملنا مقدمة بسيطة عرّفنا فيها أشهر أوسمة الميتا المعروفة ... و فاضلنا أهم أربع أوسمة ... و قلنا هنتكلم عنهم باستفاضة شوية في الفيديو ده و هما ... الـ Title و الـ Keywords و الـ Description و الـ Robots.

و قبل ما نتكلم عن أي وسم ... هنشوف الأول ازاي محرك البحث ... و ليكن مثلاً Google ... بيظهر الموقع كنتيجة من نتايج البحث لما نعمل بحث عن كلمة أو موضوع معين ... هنفتح الـ Browser و نعمل بحث عن كلمة معينة و لتكن Arabsat Online و نشوف النتايج ... هنلاقي النتيجة دي مثلاً بتتكون من ثلاث أجزاء ... اسم الصفحة ... و تحته وصف مختصر ليها ... و تحته اللينك أو الرابط اللي بيؤدي للصفحة ... بالنسبة لاسم الصفحة ده بيكون عبارة عن وسم الـ Title اللي انت كاتبه بالظبط في صفحتك ... أما الوصف المختصر ... ممكن يختلف عن وسم الـ Description اللي في الصفحة ... و بيكون عبارة عن جزء من النص اللي موجود فعلاً في الصفحة ... و غالباً بيكون الجزء الأول من أول فقرة موجودة في الصفحة ... و بالتالي نقدر نحدد الوصف ده بطريقة إضافية غير أوسمة الميتا ... ببساطة حط الوصف اللي انت عاوزه في أول نصوص الصفحة ... يعني لو بصينا للوصف ده و فتحنا الصفحة هنلاقي نفس النص موجود في بدايتها.

طيب ... أسهل وسم من الأوسمة اللي معانا النهاردة هو وسم الـ Title ... ببساطة أي مقال أو موضوع أو حتى فيديو في الصفحة بيكون ليه عنوان ... كل اللي عليك انك تنسخ العنوان الرئيسي اللي موجود في الصفحة و تحطه في الـ Content الخاص بوسم الـ Title ... و ممكن تضيف جنبه اسم الموقع الرئيسي أو الدومين الخاص بالموقع على حسب انت عاوز محرك البحث يعرف موقعك ازاي ... بالـ Title بتاعه وللا بالدومين الخاص بيه ... بمعنى ... فيه مواقع بيكون الـ Title بتاعها هوه نفسه الدومين الخاص بيها ... زي YouTube و Twitter و Flicker و Facebook و غيرهم ... طيب ازاي المواقع دي اسمها انتشر في محركات البحث بنفس اسم الدومين الخاص بيها ... الإجابة بسبب وسم الـ Title ... هنلاقي الـ Title بتاع كل صفحة في أي موقع من دول بيحتوي على اسم الموقع ... و لما نشوف مثلاً صفحة New2SEO على الـ Facebook ... هنلاقي اسم الصفحة مكتوب جنبه كلمة Facebook زي ماحنا شايفين.

من أهم الأخطاء الشايعة في وسم الـ Title اللي مش لازم نقع فيها ... تكرار وسم الـ Title نفسه في أكتر من صفحة و ده من أخطر الأخطاء ... لأن في الحالة دي ثقة محرك البحث في موقعك بتقل جداً و ده بيأثر على مستوى موقعك في نتايج البحث الخاصة بيه ... و موضوع عدم التكرار ده قاعدة ثابته في كل الأوسمة اللي معانا النهاردة.

ندخل بأه دلوقتي على وسم الـ Description و الـ Keywords ... و هشرحهم مع بعض لأنهم متشابهين جداً في طريقة كتابتهم و وظيفتهم في الصفحة و أهميتهم بالنسبة لمحركات البحث ... لكن عشان نعرف مين أهم ... طبعاً وسم الـ Keywords أهم و أقوى ... لكن ده ميمنعش ان وسم الـ Description مهم برده.

طيب ... وسم الـ Keywords بيتكون من ايه ؟ ... ببساطة بيتكون من أهم الكلمات الموجودة في الصفحة.

طيب ... ازاي بعد ما نختار الكلمات المهمة نثبت لمحرك البحث ان هيا دي أهم كلمات موجودة في الصفحة عشان نكسب ثقته و يصدق فعلاً ان هيا دي الكلمة المفتاحية للصفحة؟ ... محرك البحث بيقيم أهمية الكلمات بعاملين ... أول عامل ... عدد مرات تكرار الكلمة في الصفحة ... و تاني عامل ... نسبة تكرار الكلمة في الصفحة أو الـ Keyword Density

يعني ايه؟ ... و ايه الفرق بين الاتنين؟ ... العامل الأول و هوه عدد مرات تكرار الكلمة واضح ... و بيكون عبارة عن رقم بيحدد عدد مرات التكرار ... أما العامل التاني تفسيره بسيط جداً ... احنا لو هنفترض ان الصفحة فيها 10 كلمات بغض النظر عن التكرار ... الكلمة الأولى اتكررت 5 مرات و التانية 4 مرات و التالتة 3 مرات و الرابعة مرتين ... و من الخامسة للعاشرة اتكتبت مرة واحد بس ... يبقى عندنا مجموع الكلمات الموجودة في الصفحة بالاضافة للتكرار الموجود ... 5 + 4 + 3 + 2 + 6 = 20 ... طيب ... لو عاوزين نجيب الـ Keyword Density لكلمة من الكلمات الموجودة في الصفحة ... هنطبق المعادلة دي ( النسبة المئوية لناتج عدد مرات تكرار الكلمة ÷ المجموع الكلي للكلمات الموجودة في الصفحة )... و هنحسب الـ Keyword Density لأول كلمة ... اللي اتكررت 5 مرات يبقى 5 ÷ 20 = 0,25 × 100 = 25% ... يبقى الـ Keyword Density للكلمة الأولى يساوي 25% ... طبعاً كل ما كانت الكلمة ليها عدد مرات تكرار أكتر و ليها Keyword Density أكبر أهميتها بتزيد عند محرك البحث لما بييجي يأرشف الصفحة دي ... مش عاوز بس الناس تتخض من الأرقام و المعادلات ... يعني انت لو عاوز تطلع الكلمات اللي ليها Keyword Density عالية في الصفحة هتقعد بأه تعد كلمات الصفحة كلها و تحسب كل كلمة ليها نسبة كام و تجمع الأعلى ؟ ... لا لا لا ...

تعالو بينا نفتح موقع جميل جداُ اسمه SeoCentro.Com ... نضغط على Meta Tag Analyzer ننزل تحت شوية و نكتب اسم الصفحة اللي احنا عاوزين نضيفلها وسم الـ Keywords ... طبعاً الصفحة لازم تكون متصممة و كاملة و مرفوعة عالنت و شغالة تمام ... و بعدين هنختار روبوت البحث اللي عاوزين نظبط الصفحة عليه ... دي مش هتفرق كتير لأن كلهم متشابهين ... و بعدين هنكتب كود الحماية ده هنا ... و نضغط Submit

الموقع ده بيقدم خدمة تحليل أوسمة الميتا و توافقها مع محركات البحث مجاناً ... نشوف بقى نتيجة تحليل الصفحة اللي كتبنا عنوانها دلوقتي ...

الجزء الثاني من الدرس الأول : تعريفات أوسمة الميتا ( الميتا تاج )

القيمة الأولى زي ماحنا شايفين هيه الـ Content-Type أو نوع المحتوى و اللي بتحدد نوع لغة البرمجة اللي مكتوب بيها الصفحة و غالباً بتكون text/html ... و الـ charset اللي بعدها دي نوع أحرف الكتابة اللي نصوص الموقع و محتواه مكتوبين بيها ... طبعا القيمة دي ده رغم انها بسيطة و مش معقدة إلا إن أي خطأ فيها بيسبب عدم ظهور الصفحة بالشكل الصحيح ... يعني ممكن تظهر على هيئة رموز و أشكال مش مفهومة ... لكن احنا مش هنتعب فيها أصلاً لأن أي برنامج تصميم صفحات زي Dreamweaver أو Expression Web بيضيف القيمة دي أوتوماتيك للوسم حسب نوع الصفحة اللي انت عاوز تصممها بيه

أما القيمة التانية لنفس الوسم هيه Content-Language واضح جداً منها انها بتحدد لغة نصوص الصفحة ... فلو كانت النصوص باللغة العربية بيكون content الخاص بالقيمة دي بتساوي AR و لو كانت باللغة الانجليزية content هيساوي EN-US و لو كانت باللغة الفرنسية content هيساوي FR

طبعاً لازم نعرف ان وسم الـ http-equiv الواحد مينفعش يكون فيه أكتر من content واحد في نفس السطر ... لازم يكون كل content في سطر مستقل زي ماحنا شايفين هنا و ده بينطبق على كل أوسمة الميتا

ندخل بعد كده في وسم الـ name ... وظيفته ببساطة احتواء القيم التانية المعروفة زي ما وسم http-equiv بيحتوي Content-Type و Content-Language ... وسم الـ name ممكن يحتوي قيم زي الكلمات المِفتاحية ... وصف الصفحة ... عنوان الصفحة ... و غيرهم ... و اللي هيتركز كلامنا عليهم بعد كده لأن التلات قيم الأخيرة هما اللي محرك البحث بيقيم الصفحة من خلالهم زي ما اتكلمنا في أول الفيديو و و هنتكلم عنهم باستفاضة عشان كده هنخليهم على جنب دلوقتينمسك دلوقتي قيمة الـ Copyright و تجاوزاً بنفول عليها وسم الـ Copyright ... و ده بيحدد عن حقوق الملكية الخاصة بالصفحة و محتوياتها ... زي الفيديوهات أو النصوص أو الكتب أو المواد للتحميل ... و بنكتب في الـ content هنا اسم شركتك التجاري أو موقعك لو معندكش شركة

وسم الـ Rating و ده بيحدد الفئة العمرية اللي انت بتفضل انها تدخل على الموقع يعني لو الموقع مثلاً في فيديوهات عنف أو حوادث لا قدر الله بتكتب في الـ content بتاع الوسم ده restricted و في الحالة دي بتعرف جوجل ان لو طفل أقل من 18 سنة بيحاول يعمل بحث عن كلمة من الكلمات اللي بتؤدي لظهور موقعك في صفحات البحث ... يحجب موقعك عن الطفل ده و ميظهرلوش لأن محتواه غير مناسب ليه ... و فيه اختيارات تانية للـ content زي general و mature و 14 years و safe for kids و طبعاً كلنا ان شاء الله هنختار هنا general لأن محتوى مواقعنا مش هيكون مخالف أو يحتاج تحديد فئة معينة للمشاهدة لأن معظمنا طبعاً بيتعامل مع جوجل أدسنس اللي بترفض المواقع اللي زي كده

وسم الـ Designer و ده بتكتب فيه اسم مصمم الموقع أو اسم شركته أو موقعه الالكتروني و لو انت المصمم يبقى تكتب اسم شركتك أو اسم الموقع نفسه و ممكن تكتب فيه اسم الدومين الخاص بالموقع ... مافيش قيود هنا

وسم الـ revisit-after و ده بيقول لمحرك البحث لما بيدخل يأرشف الموقع فعلاً تعالى تاني أرشف الموقع بعد فترة معينة يعني لو كتبت في الـ content رقم 7 هيجيلك محرك البحث تاني بعد أسبوع و لو كتبت 1 هيجيلك بعد يوم ... فوت علينا بكرة يعني !!

وسم الـ Robots و ده وسم بيوجه روبوتات البحث اللي بتيجي تأرشف الموقع و تديهم بعض التعليمات عشان يأرشفو الموقع بالطريقة اللي انت عاوزها ... يعني ممكن مثلاً تمنع محرك بحث معين من الدخول لموقعك و أرشفته ... و ممكن تمنع محركات البحث كلها من الدخول لصفحة معينة أو مجلد كامل و تستبعده من الأرشفة زي مجلدات لوحة التحكم مثلاً ... و الوسم ده من الأوسمة اللي يطول شرحها عشان كده مش هنطول معاه دلوقتي و لينا معاد معاه بالتفصيل بعدين

وسم الـ Author و ده واضح برده انه بيدل على كاتب أو مؤلف المحتوى الموجود بالصفحة و الـ content الخاص بيه بيحتوي على اسم شخص أو شركة أو زي مانت عاوز

وسم الـ Audience أو الجمهور و ده بيخليك تحدد فئة معينة من زوار الصفحة و يشبه وسم الـ Rating لكن الفئات اللي بيحددها الوسم ده مختلفة و دايماً بنكتب في الـ content بتاعه All بمعنى ان كل الزوار ممكن يدخلو الصفحة دي

وسم الـ Distribution وده بيحدد خصوصية الصفحة يعني لو انت عمل صفحة خاصة بيك و مش عاوز حد يفتحها هتكتب في الـ content هنا Local أو IU اختصار لكلمة Internal Use يعني غير مخصصة للاستخدام العام و لو الصفحة عادية و مش عاوز تخليها خاصة بتكتب Global و ده الاختيار اللي كلنا هنكتبه طبعاً ... الوسم ده ميعتبرش حماية للصفحة ... ده مخصص بس للتعامل مع محركات البحث

كده نبقى خلصنا تعريف أشهر الـ Meta Tags و فاضلنا أهم 4 Meta Tags هنتكلم عنهم باستفاضه في الفيديو الجاي ان شاء الله و هم الـ title و Description و الـ Keywords و الـ Robots

الجزء الأول من الدرس الأول : تعريفات أوسمة الميتا ( الميتا تاج )

بسم الله الرحمن الرحيم

أهلا بكل اللي بيشاهد الفيديو ده معانا ...

هتكلم النهاردة بإذن الله عن موضوع هام جداً ... و معلش اعذروني ان كنت هشرح بعض النقط اللي ممكن تكون معروفة لمعظمنا أو كلنا ... لكن أنا عامل حساب أي حد لسه بيحاول يدخل المجال ده و عاوز يتعلمه

عاوز اقولكو بس حاجة صغيرة ... الفيديو ده و الفيديوهات اللي جاية ان شاء الله كلها غير تجارية و هدفي منها نقل العلم و الخبرة لكل واحد محتاجها وتمنها الوحيد بالنسبالي دعوة صالحة بس و مفيش أي دعاية من أي نوع عن موقع أو شركة معينة

كلنا طبعاً يعرف أوسمة الميتا أو Meta Tags اللي بتبقى الشغل الشاغل لأصحاب المواقع لما حد بيبدأ في بناء و تصميم و نشر موقع جديد ... وظيفة Meta Tags دي باختصار انها بتعرف محركات البحث على موقعك

عشان محرك البحث يأرشف صفحات موقعك لازم يعرف الصفحات دي بتتكلم عن إيه و بخصوص ايه و طبعاً مش المفروض انه يدور في جميع كلمات الصفحة عشان يعرف هيه بتتكلم عن ايه ... لأ ... انت كصاحب موقع بتقدمله ملخص مختصر عن محتوى الصفحة من خلال الـ Meta Tags

لكن مش معنى كده انك ممكن تضحك عليه و تقدمله Meta Tags مبتوصفش بالظبط محتوى صفحتك ... لأن في حالة انه هيلاقي اختلافات كبيرة بين الـ Meta Tags اللي انت مقدمهاله و بين محتوى الصفحة اللي فيها الـ Meta Tags دي مش هيهتم بيها أصلاً و هتكون في نهاية ترتيب المواقع بالنسبة لمحرك البحث و احتمال ما يأرشفهاش أصلاً في الـ Database بتاعته

و من هنا بتيجي الأهمية الكبيرة للـ Meta Tags كواحد من أهم العوامل اللازمة لرفع مستوى الموقع في محركات البحث ...

طيب ايه أصلاً أهمية محركات البحث دي اللي بنتكلم عليها ؟؟

طبعاً كلنا يعرف Google و live Search و Yahoo و ask و غيرها كتير جداً من محركات البحث ... المواقع دي بتقوم بأرشفة جميع المواقع اللي موجودة على شبكة الانترنت و بتخزن بياناتها على Database خاصة بيها و اللي منها بتظهر نتائج البحث لأي مستخدم يعمل بحث عن كلمة أو موضوع معين

و من خلال الإحصائيات اللي بتأكد استخدام ملايين الأشخاص على مستوى العالم لمحركات البحث بمجرد اتصالهم بالانترنت نكتشف حقيقة الأهمية الكبيرة لمحركات البحث و برده من خلال الإحصائيات ان 95% من مستخدمي محركات البحث بيقرو الصفحة الأولى بس من نتايج البحث و مبينتقلوش للصفحة الثانية و بالتالي نقدر نعرف أهمية تحسين ترتيب مستوى مواقعنا في نتايج البحث للوصول للصفحة الأولى و ده من خلال طرق كتير لازم كلها تتنفذ و ربنا يقدرني ان شاء الله و اشرحها في الفيديوهات الجاية و من أهمها الإعداد الجيد لأوسمة الميتا أو الـ Meta Tags

ندخل بأه في موضوعنا و هو ... أوسمة الميتا ... و ازاي نجهزها بطريقة ... تتوافق مع محركات البحث و تساعد في أرشفة الصفحات ... و هنبدأ بمقدمة بسيطة ... هشرح فيها معنى كل وسم باختصار عشان نبدأ في شرحها بعد كده بالتفصيل حسب الأهمية

هنعرف الأول مكونات أو صيغة وسم الميتا ... بداية سطر الوسم بيكون عبارة عن القوس ده ... و بعدين كلمة Meta ... و بعدين اسم الوسم اللي هو http-equiv أو name و الاسم ده بيساوي قيمة معينة زي ماحنا شايفين بتحدد نوع البيان اللي بيقدمه الوسم ده ... و بعد الاسم هنلاقي الـ content و ده بيحدد قيمة البيان اللي بيقدمه الوسم ... و طبعاً لازم اسم الوسم و الـ content الخاص بيه يكونو داخل Quotation marks زي كده و في النهاية slash و قفلة القوس

أوسمة الميتا أنواع ... هنتكلم دلوقتي عن اللي يهمنا منهم بس في موضوعنا ... و هما اتنين الـ http-equiv و الـ name

الوسم الأول ... وسم الـ http-equiv ... و معناه معادل الـ http ... و عشان نفهم يعني ايه معادل الـ http ... لازم نفهم ايه اللي بيحصل لما بنكتب اسم موقع معين في شريط العناوين في الـ Browser أو متصفح الانترنت و نضغط على Enter ... في لحظة الضغط على Enter بيبعت المتصفح طلبك ... اللي هو اسم الموقع من خلال الـ http للسيرفر اللي الموقع ده موجود عليه ... و مش هنقول طب ازاي Browser عرف السيرفر اللي بعتله الطلب؟ عشان مانبعدش عن موضوعنا الأساسي ... المهم ... لما السيرفر اللي استلم الطلب بيلاقي الموقع المطلوب عنده بيبعت رد للـ Browser بتاعك في صورة بيانات ... أول بيان بيبعته هوه الـ http-equiv و ده بيحدد نوع الصفحة أو نوع البيانات اللي فيها الصفحة عشان الـ Browser يقدر يفتحها و يتعامل معاها بالطريقة المناسبة ... و هنبدأ نتعرف على الـقيم الخاصة بوسم الـ http-equiv